Təmiz su çox zəif dərəcədə də olsa elektrik cərəyanını keçirir. Bu, su molekullarının cüzi miqdarda da olsa ionlarına dissosiasiya etməsi ilə əlaqədardır:

    H₂O ↔ H⁺ + OH^¯

    Normal şəraitdə suyun dissosiasiya daracəsi 1,8*10^-9 rəqəmi ilə xarakterizə olunur. Beləliklə, su çox zəif elektrolitdir, onun elektrolitik dissosiasiyasını təsvir etmək üçün kütlələrin təsiri qanunu tətbiq edilir:

    [H⁺] [OH^¯] = K [H₂O]²

    Burada K - suyun elektrolitik dissosiasiya sabitidir/

    Praktiki olaraq, [H₂O] = const olduğundan:

    [H⁺] [OH^¯] = K_HOH

    K_HOH - sabiti suyun ion hasili adlanır.

    Otaq temperaturunda suyun ion hasilinin qiyməti yuvarlaq şəkildə 10^-14 -ə bərabər götürülür.

    Məhlulda hidrogen və hidroksil ionlarının qatılıqlarının nisbətindən asılı olaraq, mühit reaksiyası turş, əsasi və neytral ola bilər. Belə ki, həmin ionların qatılıqları bir-birinə bərabər olduqda, yəni [H⁺] = [OH^¯] olduqda, mühit reaksiyası neytral olur. Həmin ionların birinin qatılığı digərininkinə nisbətən üstünlük təşkil etdikdə isə mühit reaksiyası turş  ([H⁺] > [OH^¯]) və ya əsasi ([H⁺] < [OH^¯]) olur.

    Suyun ion hasili 10^-14 rəqəmi ilə xarakterizə olunur. Buradan hidrogen ionlarının qatılığı hidroksil ionlarının qatılığına bərabər olduqda, onun ədədi qiyməti

    [H⁺] = √10^-14 = 10^-7 olar.

    Danimarka alimi Syerensenin təklifi ilə (1909) H⁺ -nun qatılığı əvəzinə onun əks işarə ilə götürülmüş onluq loqarifmindən istifadə edilir. Bu kəmiyyət hidrogen göstəricisi adlanır və pH (pe-haş) ilə işarə olunur:

    pH = - lg [H⁺]

    buradan,

    pH = - lg 10^-7 = 7 olar.

    Beləliklə, pH=7 olduqda mühit neytral, pH < 7 olduqda turş, pH > 7 olduqda isə mühit əsasi xassəli olur.

    Məhlullarda pH-ın qiyməti pH-metr adlanan xüsusi cihazlarda, həmçinin primitiv və təxmini olaraq, universal indikator kağızının köməyi ilə təyin edilə bilər.