Adi şəraitdə oksidlər qaz (CO₂, NO, SO₂), maye (SO₃) və bərk (bütün əsasi, amfoter oksidlər və bəzi turşu oksidləri - P₂O₅, SiO₂) maddələrdir. Oksidlər müxtəlif rənglərdə olur: CuO - qara, Cu₂O - qırmızı, CaO - ağ, HgO - sarı, Cr₂O₇ - yaşıl və s. Amfoter oksidlər bir qayda olaraq suda həll olmur.

1. Əsasi oksidlər turşularla qarşılıqlı təsirdə olub duz və su əmələ gətirirlər:

    CuO + H₂SO₄ → CuSO₄ + H₂O   

2. Aktiv metalların (qələvi və qələvi-torpaq metalları) oksidləri adi şəraitdə su ilə qarşılıqlı təsirdə olub qələvi əmələ gətirir:

    Na₂O + H₂O → 2NaOH

3. Turşu oksidləri qələvilərlə qarşılıqlı təsirdə olub duz və su əmələ gətirir:

    SO₃ + 2KOH → K₂SO₄ + H₂O

4. Turşu oksidlərinin çoxu su ilə qarşılıqlı təsirdə olub turşu əmələ gətirir:

    SO₃ + H₂O → H₂SO₄

5. Az uçucu turşu oksidləri çox uçucu turşu oksidlərini onların duzlarından sıxışdırıb çıxarır:

    CaCO₃ + SiO₂ →CaSiO₃ + CO₂

6.Turşu və əsasi oksidlərin ümumi xassəsi onların bir-biri ilə qarşılıqlı təsirdə olub du əmələ gətirməsidir:

    CaO + CO₂ → CaCO₃

7. Amfoter oksidlər su ilə bilavasitə birləşmir, lakin həm turşu, həm də qələvilərlə qarşılıqlı təsirdə olur:

    Al₂O₃ + 6HCl → 2AlCl₃ + 3H₂O

    Al₂O₃ + 2NaOH + 3H₂O → 2Na[Al(OH)₄]

    Alüminium oksidi qələvilərlə əritdikdə metaalüminatlar əmələ gəlir. Reaksiya ilə əsasların xassələri bölməsində tanış olmaq olar.

8. Bəzi oksidlər qızdırıldıqda asanlıqla parçalanır:

    2HgO → 2Hg + O₂;     2SO₃ → 2SO₂ + O₂

9. Oksidlər reduksiyaedicilərlə qarşılıqlı təsirdə olurlar:

    SiO₂ + 2Mg → Si + 2MgO; CO₂ + C → 2CO

10. Bəzi turşu oksidləri müəyyən turşularla qarşılıqlı təsirdə olurlar:

    SO₂ + 2HNO₃ → H₂SO₄ + 2NO₂

11. Bəzi oksidlər oksigenlə qarşılıqlı təsirdə olur:

    2SO₂ + O₂ → 2SO₃;     2NO + O₂ → 2NO₂