Molekul kütləsi böyük olan karbohidrogenlərin parçalanması nəticəsində kiçik molekullu karbohidrogenlərin əmələ gəlməsinə krekinq deyilir:

    C₁₆H₃₄ → C₈H₁₈ + C₈H₁₆

    Krekinq prosesinin iki əsas növü var: termiki və katalitik.

    Termiki krekinqin də iki növü var:

    1. Aşağı temperatur (450-500 ⁰C) və yuxarı təzyiqdə (2-7 MPa);

    2. Yuxarı temperatur (550-600  ⁰C) və aşağı təzyiqdə (0,3-0,5 MPa) aparılan proseslər.

    Termiki krekinq nəticəsində normal quruluşlu karbohidrogenlər əmələ gəlir. Krekinq prosesində əmələ gələn qazlara krekinq qazı, benzinə isə krekinq benzini deyilir.

    Termiki krekinq prosesi sərbəst radikal mexanizmi üzrə gedir.

    Katalitik krekinq alümosilikat (Al₂O₃ SiO₂) katalizatorlarının iştirakı ilə nisbətən aşağı temperaturda (450-500  ⁰C) aparılır. Termiki krekinqdən fərqli olaraq daha sürətlə gedir. Katalitik krekinq zamanı karbohidrogenlərin həm parçalanması, həm də izomerləşməsi yəni normal quruluşlu karbohidrogenlərin şaxəli karbohidrogenlərə çevrilməsi baş verir.

    Katalitik krekinq məhsullarında doymamış karbohidrogenlər az olduğundan onlarda öz-özünə oksidləşmə və polimerləşmə getmir.